गत वर्ष नेपाली क्रिकेटको स्वर्णिम काल थियो। प्रशिक्षक पुबुदु दासानायकेले नेपाली क्रिकेटको ठूलो छलाङको बाटो खोल्ने अभियान थालनी गरे। नेपाली खेलाडीलाई विदेशी लिगमा खेलाउनु सफलताका प्रमुख आधार थिए। फरक क्रिकेट अनुभवले खेलाडी निखारिएका थिए। 'एक्सपोजर' नपाउनु नेपाली क्रिकेटको प्रमुख समस्या भएको पुष्टि भएको थियो। यस पटक पनि ज्ञानेन्द्र मल्ल, वसन्त रेग्मी, अनिल मण्डल, प्रदीप ऐरी, नरेश बुढाऐर र राजेश पुलामी विदेशमै खेलिरहेका छन्।
'कुनै पनि खेलाडीलाई मानसिक रुपमै बलियो बनाउनु पर्छ। त्यसका लागि यहाँ खेलाएर मात्र पुग्दैन, सधै एउटै टोलीसँग खेल्दा सवैलाई सवैबारे थाहा हुन्छ,' मलेसियामा डिभिजन ४ जितेर फर्किएपछि राष्ट्रिय टोलीका कप्तान पारस खड्काले भनेका थिए, 'यो उपाधि त्यही प्रमाण हो। यसको श्रेय प्रशिक्षक दासानायकेलाई दिनुपर्छ। यसको प्रभाव भविषयमा थप देख्न पाइनेछ।'
दासानायकेले खेलाडीलाई निरन्तर खेल्ने वातावरण बनाउदै पारसलाई क्लब क्रिकेट खेल्न क्यानाडा पठाए भने शक्ति गौचनलाई ट्रायलमा राजस्थान रोयल्ससम्मको बाटो देखाए। ज्ञानेन्द्र मल्ल, शरद भेषावकर, अनिल मण्डल जस्ता ब्याट्सम्यानलाई भारत प्रशिक्षणका लागि पठाए। अमृत भट्टराई र चन्द्र साउद श्रीलंकाको यु–२३ लिग खेल्न गए। यो सवै दासानायकेको व्यक्तिगत पहलमा सम्भव भएको थियो।
नेपाली खेलाडीको प्रदर्शन
गत वर्ष नेपाली क्रिकेटका सवैभन्दा सफल बलर वसन्तले अन्तत क्यानाडामा विकेट लिने क्रम सुरु गरेका छन्। क्यानाडाको पहिलो डिभिजन लिगमा जेटिए च्यालेन्जर्सबाट खेलिरहेका वसन्तले पहिलो चार खेलमा कुनै विकेट लिन सकेका थिएनन्।
पहिलो चार खेलमा वसन्तले २४.५ ओभर बलिङ गरेका थिए। इकोनोमी २.४२ भए पनि उनले विकेट लिन सकेका थिएनन्। नेपालले खेलेको पछिल्ला चार प्रतियोगितामा वसन्तले ५५ विकेट लिएका थिए। विश्व क्रिकेट लिग डिभिजन ४, एसिसी ट्रफी इलिट र एसिसी ट्वान्टी–२० गरी वर्ष २०६९ मा मात्र उनले ४३ विकेट लिएका थिए।
इम्पेरियल स्टालियन्स सिसीसँगको पछिल्लो खेलमा उनले ५ विकेट लिदैं क्यानाडामा विकेटको खडेरी तोडेका छन्। वसन्तले ८ ओभरमा १ मेडन राख्दै ११ रनमात्र खर्चेपछि इम्पेरियल ३१.४ ओभरमा ७५ रनमा सीमित भएको थियो। वसन्तले अलराउन्ड प्रदर्शन गर्ने क्रममा ५ चौकासहित अविजित ६५ रन बनाउदा जिटिए ४३.६ ओभरमा १ सय ४६ रन बनाई अल आउट भएको थियो।
क्यानाडामा आफ्नो पहिलो खेल खेल्दा पनि वसन्तले जिटिएलाई ब्याटिङबाटै विजय दिलाएका थिए। वसन्तले अविजित ४४ रन बनाएपछि घजनाभी क्रिकेट क्लबसँगको खेल जिटिएले २ विकेटले जितेको थियो। वसन्त यस सिजनमा अहिले सम्म सवैभन्दा बढी रन बनाउने खेलाडी हुन्। उनले ६४.५० को औषतमा १ सय २९ रन बनाइसकेको छ।
वसन्त गएपछि जिटिएले ३ खेल जितेको छ भने एक खेल हारेको छ। १ खेल वर्षाले विथोलेको थियो। वाइलु कन्फ्रेन्समा जिटिए ८ खेलमा २७ अंकका साथ चौथो स्थानमा छ। वसन्तसँगै नेपाली राष्ट्रिय टोलीका उपकप्तान ज्ञानेन्द्र क्यानाडामा लिग क्रिकेट खेल्न गएका थिए। गत वर्ष कप्तान पारसले खेलेको टोली ओन्टारियो क्रिकेट एकेडेमी क्लबबाट खेलिरहेका छन्।
ज्ञानेन्द्रले पहिलो खेल वाइलु कन्फ्रेन्समा जिटिएबाट खेल्दै ९ रन बनाएका थिए। त्यसपछि खेलेका तीन मध्येका दुई खेलमा व्यक्तिगत उच्च स्कोर गरेका छन्। अर्को खेल वर्षाले पूरै विथोलेको थियो। गुजरात क्रिकेट क्लबसँगको खेलमा ४० रन बनाएका ज्ञानेन्द्रले टोरोन्टो क्रिकेट क्लबसँग १८ रन बनाएका थिए।
नेपालका अर्का दुई खेलाडी प्रदीप ऐरी र अनिल मण्डल यु–२३ लिग खेल्न श्रीलंकामा छन्। बर्मुडामा भएको डिभिजन ३ मा युगान्डासँग म्यान अफ द फाइनल बनेका प्रदीप पहिलो खेलमा शुन्यमै आउट भए। गेल क्रिकेट क्लबसँगको दुइदिवसीय खेल प्रदीपको टोली कुरुनेगाला युथ क्रिकेट क्लबले पहिलो इनिङ्सको आधारमा जित्यो। कुरुनेगालाले केन्डीको असगिरिया क्रिकेट रंगशालामा इङ्ल्यान्ड यु–२३ युनिभर्सिटी टोलीसँग अभ्यास खेलमा प्रदीपले ९ बलमै अविजित २३ रन बनाएका थिए।
सुवास खकुरेलसँगै प्रदीप श्रीलंकामा यु–२३ क्रिकेट लिग खेल्न जेठको अन्तिम साता कोलम्बो लागेका थिए। घरासायी कारण देखाउदै ओपनिङ ब्याट्सम्यान तथा विकेटकिपर सुवास खकुरेल श्रीलंकाबाट फर्किएपछि उनको स्थान लिन अनिल मण्डल यसै हप्ता एक महिनाका लागि श्रीलंका लागेका थिए। उनले डिभिजन २ को प्रतियोगितामा प्रदीपसँग कुरुनेगालाबाट खेल्ने छन्।
त्यस्तै युवा ब्याट्सम्यानद्धय नरेश बुढाऐर र राजेश पुलामी इङ्ल्यान्डमा छन्। उनीहरुले मेरिलीबोन क्रिकेट क्लबमा प्रशिक्षण लिइरहेका छन्। उनीहरुले त्यहाँ ६ हप्ता प्रशिक्षण गर्नेछन्। नरेश र राजेशले क्रिकेटको मन्दिर मानिने लर्डस क्रिकेट मैदानमा अभ्यास गर्न र आसन्न एसेज शृंखला हेर्न पाउने सम्भावना छ।
लन्डनमा रहेका प्रशान्त कुँवरमार्फत नरेश र राजेश मेरिलिबोनसम्म पुगेका थिए। नरेश र राजेशको प्रदर्शन राम्रो हुने हो भने भविश्यमा लर्डसमा अन्य नेपाली खेलाडीको ढोका खुल्ने कुँवर बताउछन्। नागरिक