काठमाडौ, - 'मैले काम गर्दा कहिल्यै केही अपेक्षा गरेको थिइनँ,' नेपाली राष्ट्रिय क्रिकेट टिमका प्रशिक्षक पुबुदु दसानायकेले सोमबार कान्तिपुरसँगको टेलिफोन वार्तामा यस्तै जवाफ दिए । उनले थपे, 'तर कसैले तिम्रो कामको प्रशंसा गर्दै सम्मान गर्छ भने त्यसले तिमीलाई आनन्द महसुस हुन्छ ।'

प्रशिक्षक पुबुदु अहिले क्यानडामा छन् । नेपाली टिमलाई बर्मुडामा आईसीसी वल्र्ड क्रिकेट लिग डिभिजन-३ को उपाधि थमाएर उनी उतैबाट घर लागेका थिए । गत साता नेपाल खेलकुद पत्रकार मञ्चले प्रदान गरेको पल्सर स्पोर्ट्स अवार्ड २०६९ मा उनी वर्षको उत्कृष्ट प्रशिक्षक चुनिए । नेपालले अघिल्लो वर्ष दुई ठूला ट्रफी -मलेसियामा डिभिजन-४ र यूएईमा एसीसी ट्रफी एलिट) यिनै पुबुदुको प्रशिक्षणमा जितेको थियो ।  

'मलाई नेपालबाट पनि थुप्रै बधाई आयो । घरमा पनि सबैले बधाई दिए,' उत्साहित रूपमा पुबुदुले भने । उनले क्रिकेट टिम नै वर्षको उत्कृष्ट टिम र क्रिकेटकै कप्तान पारस खड्का वर्ष पुरुष खेलाडी भएकोमा खुसी व्यक्त गरे । उनले भने,'गत १२ महिना टिमले राम्रो खेल्यो । टिमका मुख्य सदस्य पारसले उत्कृष्ट प्रदर्शन गरेका थिए ।'

उनले टिम र पारसले यस्तो सम्मान पाउनु उचित भएको पनि बताए । सम्मानले सबैको हौसला बढाएको उल्लेख गर्दै उनले भने,'अहिलेको सफलतामा धेरै खुसी भएर बस्नु उचित हुन्न । नेपाली क्रिकेटमा अबको ६ महिना सबैभन्दा महत्त्वपूर्ण छ । हामी यसबीचमा ट्वान्टी-ट्वान्टी र वान-डे वल्र्डकप छनोट खेल्दैछौं । त्यसमा सफल हुनु हाम्रो चुनौती हो । त्यसैमा बढी केन्दि्रत हुनुपर्छ ।'

 नेपालले नोभेम्बरमा यूएईमा आईसीसी ट्वान्टी-ट्वान्टी वल्र्डकप छनोट र न्युजिल्यान्डमा सन् २०१४ को सुरुमा वान-डे वल्र्डकप छनोट खेल्नेछ । पुबुदुले यी दुई महत्त्वपूर्ण प्रतियोगिताको तयारीका रूपमा लिएका छन्, अगस्ट १७-२५ सम्म सिंगापुरमा हुने एसीसी इमर्जिङ टिम्स कपलाई । भन्छन्,'त्यहाँ हामीले बलिया टिमसँग खेल्नेछौं । खेलाडीलाई अनुभव हुनेछ । आफ्ना थप गल्ती थाहा पाउन सकिनेछन् । कसरी अघि बढ्न सकिन्छ भनेर त्यहाँबाट वल्र्डकप छनोटका लागि बाटो बनाउन सकिनेछ ।'

आठ टिम सम्मिलित इमर्जिङ टिम्स कपमा नेपाल समूह 'ए' मा छ । यसै समूहमा वान-डे मान्यताप्राप्त अफगानिस्तान र टेस्ट मान्यताप्राप्त भारत र पाकिस्तानका यू-२३ टिम हुनेछन् । नेपाली क्रिकेट टिमको चार दिनपछि इमर्जिङ टिम्स कपका लागि प्रशिक्षण सुरु हुने भए पनि प्रशिक्षक पुबुदु भने दुई सातापछि नेपाल आइपुग्नेछन् ।

पुबुदु दसानायके  

कान्तिपुर