१६ माघ, ललितपुर । एकीकृत माओवादीका अध्यक्ष पुष्पकमल दाहाल प्रचण्डले एमाओवादीलाई जनताले अझै १० वर्ष सत्ता चलाउन दिने दावी गर्नु भएको छ ।

एमाओवादी ललितपुरको ७ औं जिल्ला सम्मेलनको मंगलवार उद्घाटन गर्दै प्रचण्डले जनताको विश्वास अझैपनि एमाओवादीमै रहेको वताउनुभयो । दलित, जनजाति, मुस्लिम लगायत सबैको मुद्दालाई उठाएकोले एमाओवादीको जनतासंग रहेको बलियो सम्बन्ध कसैले टुटाउन नसक्ने उहाँको भनाई छ ।

जेठ १५ भित्रै नयाँ निर्वाचन गर्न आफूहरु जस्तोसुकै त्याग गर्न तयार रहेको भन्दै प्रचण्डले कांग्रेस-एमाले तयार नभएपछि देशलाई चुनावमा जान अब सबैले रोक्न नसक्ने बताउनुभयो । उहाँले भन्नुभयो-’नयाँ निर्वाचनमा जान एमाओवादीले के गर्नु पर्छ, जस्तो सुकै त्याग र बलिदान गर्न हामी तयार छौँ । तर निर्वाचन जेठ १५ भित्रै निर्वाचन हुनुपर्‍यो ।’

प्रचण्डले अब नेपालमा परिवर्तन विरोधीहरुको भविष्य नरहेको समेत वताउनुभयो । उहाँले दैलेखमा १०-१५ जनालाई ढुंगा हान्न लगाएर विपक्षी दल काँग्रेस एमालेले लोकतन्त्रमा फाशिष्ट चरित्र देखाएको आरोप लगाउनुभयो ।

नथ्थी लाएर विपक्षीलाई चुनावमा ल्याउँछौं: भट्टराई

प्रधानमन्त्री एवं एमाओवादी उपाध्यक्ष डा. बाबुराम भट्टराईले विपक्षी दलहरु चुनाव हुन नदिन षड्यन्त्र गरिरहेको भन्दै नथ्थी लाएर विपक्षीलाई चुनावमा ल्याउने बताउनु भयो । उहाँले भन्नुभयो-’चुनाव हुन नदिन विपक्षीहरुले षड्यन्त्र गरिरहेका छन् । उनीहरुलाई हामीले नथ्थी लगाएर भएपनि चुनावको बाटोमा ल्याउँछौ ।’

प्रधानमन्त्री भट्टराईले जसरी भएपनि जेठभित्र नयाँ निर्वाचनमा जानु पर्ने वताउनुभयो । उहाँले भन्नुभयो-’काँग्रेस-एमालेसहितका दलहरु चुनावदेखि डराइरहेका छन् । यदि जनताको विश्वास छ भने चुनावमा जान किन डराउनु पर्‍यो ?’

भट्टराईले लोकतान्त्रिक गणतन्त्रका उपलब्धिहरुलाई संस्थागत गर्नेवेलामा दलहरु चिढिएको भन्दै चिन्ता व्यक्त गर्नुभयो । भट्टराईले हेटौँडामा हुने पार्टीको ७ औं महाधिवेशनवाट पार्टी नयाँ कार्यदिशाका साथ अगाडि वढ्ने विश्वास व्यक्त गर्नु भयो ।