नायक राजेश हमाल वीरगञ्जबाट रित्तो हात फर्केका छन् । चलचित्र ‘राजनीति’ को छायांकनका लागि वीरगञ्ज पुगेका हमाल रित्तो हात फर्किएका हुन् । चलचित्रकर्मीहरुको आन्दोलनका कारण छायांकन समेत प्रभावित भएपछि चलचित्र ‘राजनीति’ युनिट ३ दिन विरगञ्ज बसेर काठमाण्डौ फर्किएको हो ।चलचित्रका निर्देशक बसन्त निरौलाले अनलाइनखबरसँग भने, ‘३ दिन विरगञ्ज बसियो तर छायांकन गर्न नपाएपछि रित्तो हात फर्कियौ ।’ उनले निर्माणपक्षलाई ३ दिनमा ५ लाख भन्दा बढि घाटा लागेको जानकारी समेत दिए ।

आइतबारबाट चलचित्रको छायांकन, पोष्ट प्रोडक्शन समेत ठप्प पारेर चलचित्रकर्मीहरु आन्दोलित छन् । निर्देशक बसन्त निरौलाले भने, ‘हामीलाई छायांकन समेत बन्द भन्ने थाहा थिएन, तर विरगञ्ज पुगेपछि छायांकन नगर्नु होला भन्दै फोन आयो ।’ खुल्छ कि भनेर २ दिन पर्खिएपनि नखुलेपछि आफुहरु छायांकन नै नगरी काठमाण्डौ फर्किएको निरौलाको भनाई छ ।

नायक राजेश हमाल सहित ४० जनाको युनिट ‘राजनीति’ को छायांकनका लागि वीरगञ्ज पुगेको थियो । कोमल वली, पवित्रा आचार्य लगायतका कलाकारको अभिनय रहेको यो चलचित्रले राजनीतिक बिषयबस्तुलाई उठान गरेको छ । चलचित्रकर्मीहरुको आन्दोलनले सिंगो सिनेमा नगरी नै प्रभावित हुदा समेत सरकारले कुनै सुनुवाई गरेको छैन ।