मृत्युदण्डको फैसलापछि ३० को मृत्यु

पोर्टसेड (इजिप्ट), माघ १४ - अदालतले २१ जनालाई मृत्यु दण्डको सजाए सुनाएपछि इजिप्टको सहर पोर्टसेडमा भड्किएको दंगामा कम्तिमा ३० जना मारिएको अन्तर्राष्ट्रिय सञ्चारमाध्यमहरुले जनाएका छन् । यही बिषयमा तीन दिन अघिबाट सुरु भएको दंगाका कारण मर्नेको संख्या ४१ पुगिसकेको छ ।
गत बर्ष एक फुटबल रंगशालामा दंगा भड्काएको आरोपमा अदालतले शनिबार प्रतिबादी ७३ मध्ये २१ जनालाई मृत्यु दण्डको फैसला सुनाएको हो । उक्त दंगामा ७४ जना फुटबल समर्थकको मृत्यु भएको थियो ।
गत बर्ष इजिप्टका प्रतिद्वन्द्वी क्लबहरु पोर्टसेडको अल मार्सी र कायरोको अल हाइलीबीच भएको प्रतिस्पर्धामा मार्सीले जितेपछि समर्थकहरु बिपक्षी खेलाडी र समर्थकविरुद्ध जाइलागेका थिए । आरोपितहरु मार्सी समर्थकहरु हुन ।
अदालतले मृत्यु दण्डको फैसला सुनाएपछि आक्रोशित बनेका आफन्त र केही फटबल समर्थकहरुले उनीहरुलाई राखिएको कारागारमा आक्रमण गरी भगाउने प्रयास गरेका थिए । प्रदर्शनकारीलाई रोक्न प्रहरीले अश्रुग्याँस र रबरको गोली प्रयोग गरेको थियो ।
भिडन्तको बेला प्रहरीले ढोका खोल्न नदिएका कारण पनि भाग्न नपाएर धेरको ज्यान गएको आरोप प्रत्यक्षदशीले लगाउँदै आएका छन् ।