१७ माघ, काठमाण्डौं । एकैपटक आमाबुबा मारिएपछि बेसहारा बनेका सप्तरी जन्डौंलका सात बर्षका बालक दिनेश भट्टराईलाई काठमाण्डौं तीनकुनेका मनोविज्ञ डा. चण्डीप्रसाद चापागाई र उनकी पत्नी विमलाले धर्मपुत्र बनाएर काठमाण्डौं ल्याएका छन् । धर्मपुत्र बनेपछि दिनेशले नयाँ नाम पाएका छन् ‘विवेकानन्द चापागाई’ ।

चापागाई दम्पतीले उनलाई धर्मपुत्र बनाएर राजधानीकै एक बोडिङ स्कूलमा भर्ना गरिदिएका छन् । चापागाई दम्पतीका दुई छोरी छन् । अब उनीहरु तीन सन्तानलाई असल नागरिक बनाउने दायित्वबोध गरिरहेका छन् । गत पुस १६ गते राति सप्तरी जन्डौलस्थित आफ्नै निवासमा सुतिरहेका बेला विवेकानन्दका बाबु ४५ बर्षका डम्बर भट्टराई र आमा ३५ बर्षकी कौशल्याको हत्या भएपछि उनीसहित उनका दाजु १५ बर्षका दीपेश र दिदि ११ बर्षकी दीपीका बेसहारा भएका थिए । त्यसपछि उनीहरु विराटनगरस्थित आफन्त भक्ति भट्टराईका घरमा आश्रय लिएर बसिरहेकेा खबर अन्नपूर्ण पोष्ट दैनिकले छापेको छ ।

विवेकानन्दलाई धर्मपुत्र बनाउने चण्डीप्रसादले अमेरिकाबाट सकारात्मक सोधखोज विषयमा विद्यावारिधि गरेका छन् भने पत्नी विमला अक्सफाम इन्टरनेसनल नेपालकी उपनिर्देशक हुन् । आमाबाबुको हत्याका कारण छोराछोरी बेसहारा भएको समाचार पत्रिकामा पढेपछि चापागाई दम्पतीले धर्मपुत्र बनाएर पालनपोषण गर्ने इच्छा देखाएका थिए । चण्डीप्रसादले भने, ‘मैलेमात्र चाहेर भएन् । पत्नी छोरी र मेरा ड्राइभरसँग पनि सल्लाह गरें । सबैजना सहमति भएपछि उनलाई तेस्रो सन्तानका रुपमा ग्रहण गरेका हौं ।’