प्रचण्डले प्रचण्डले मुलुकलाई निकास दिन जेठ १५ भित्रै ताजा जनादेशका लागि नयाँ निर्वाचनमा जानु पर्नेमा जोड दिनु भयो । नयाँ निर्वाचनमा जान आफूहरु जस्तोसुकै त्याग गर्न तयार रहेको भन्दै प्रचण्डले नयाँ निर्वाचनमा जान तयार रहन विपक्षी काँग्रेस एमालेलाई आग्रह गर्नुभयो । उहाँले भन्नुभयो,’नयाँ निर्वाचनमा जान एमाओवादीले के गर्नु पर्छ। जस्तो सुकै त्याग र बलिदान गर्न हामी तयार छौँ । तर निर्वाचन जेठ १५ भित्रै निर्वाचन हुनुपर्‍यो ।’ प्रचण्डले जेठ १५ भित्र नयाँ निर्वाचनमा जान विपक्षी दलले अस्विकार गरेपनि निर्वाचनमा जान कोही कसैले रोक्न नसक्ने वताउनुभयो ।

एमाओवादीले दलित, जनजाती, मुस्लिम लगायत सबै जातिका मुद्दालाई जाडेदारका साथ उठाएकाले एमाओवादीको जनतासंग रहेको बलियो सम्बन्ध कसैले टुटाउन नसक्ने प्रचण्डको भनाई छ । प्रचण्डले अब नेपालमा परिवर्तन विरोधीहरुको भविष्य नरहेको समेत वताउनुभयो । उहाँले दैलेखमा १०-१५ जनालाई ढुंगा हान्न लगाएर विपक्षी दल काँग्रेस एमालेले लोकतन्त्रमा फाशिष्ट चरित्र देखाएको आरोप लगाउनुभयो ।

यस्तै प्रधानमन्त्री समेत रहेका पार्टी उपाध्यक्ष डा. बाबुराम भट्टराईले विपक्षी दलहरु चुनाव हुन नदिन षड्यन्त्र गरिरहेको आरोप लगाउनुभयो । उहाँले भन्नुभयो,’चुनाव हुन नदिन विपक्षीहरुले षड्यन्त्र गरिरहेका छन् । उनीहरुलाई हामीले लठ्ठी लगाएर भएपनि चुनावको बाटोमा ल्याउँछौ ।’ मुलुकलाई निकास दिनुको विकल्प नरहेको भन्दै प्रधानमन्त्री भट्टराईले जसरी भएपनि जेठभित्र नयाँ निर्वाचनमा जानु पर्ने वताउनुभयो ।

उहाँले भन्नुभयो,’काँग्रेस-एमालेसहितका दलहरु चुनावदेखि डराइरहेका छन् । यदि जनताको विश्वास छ भने चुनावमा जान किन डराउनु पर्‍यो ?’ भट्टराईले लोकतान्त्रिक गणतन्त्रका उपलब्धिहरुलाई संस्थागत गर्नेवेलामा दलहरु चिढिएको भन्दै चिन्ता व्यक्त गर्नुभयो । भट्टराईले हेटौँडामा हुने पार्टीको ७ औँ महाधिवेशनवाट पार्टी नयाँ कार्यदिशाका साथ अगाडि वढ्ने विश्वास व्यक्त गर्नु भयो ।