२ जेठ, काठमाडौं । सरकारले आईसीसी वर्ल्ड क्रिकेट लिग डिभिजन थ्रीको विजेता नेपाली राष्ट्रिय क्रिकेट टोलीका सदस्यलाई जनही साढे ३ लाख दिने भएको छ ।

मन्त्रिपरिषद्को बिहीबार बसेको बैठकले क्रिकेट खेलाडीलाई जनही तीन लाख ५० हजार नगद पुरस्कार दिने निर्णय गरेको हो । च्याम्पियन बनेर स्वदेश फर्किएकै दिन मन्त्रिपरिषद् अध्यक्ष खिलराज रेग्मीले खेलाडीहरुलाई सम्मान गर्दै जनही साढे ३ लाख दिने घोषणा गर्नु भएको थियो ।

यसैबीच नेपाली काँग्रेसले क्रिकेट टोलीको सम्मान गरेको छ । पार्टी कार्यालय सानेपामा बिहीबार भएको कार्यक्रममा सभापति सुशील कोइरालाले खेलाडीहरुलाई सम्मान गर्नुका साथ २ लाख रुपैयाँ प्रदान गर्नुभयो ।

क्रिकेट एशोसिएसन अफ नेपाल क्यानले बुधबार मात्र खेलाडीहरुलाई जनही १ लाख नगद दिएको थियो भने सरकारसँगै माओवादी र एमालेले यसअघि नै खेलाडीहरुलाई सम्मान गरिसकेको छ । हालै बर्मुडामा भएको डिभिजन थ्रीको विजेता बनेको नेपाल डिभिजन २ मा उक्लिएको छ ।