महिला क्रिकेटको उपाधि विराटनगरलाई
विराटनगरले उमेर समूहमा हात पारेको यो सफलता महिला क्रिकेटमै पहिलो हो । उसले सिनियर टिममा पनि कुनै उपाधि हासिल गर्न सकेको छैन । वर्षाले खेल प्रभावित भएपछि खेल ५ ओभर घटाउँदै २० मा झारिएको थियो । 'प्लेअर अफ द म्याच' संगीता राईले महत्त्वपूर्ण चार विकेट लिएपछि पहिले ब्याटिङ गरेको भैरहवाले १८ ओभर १ बलमा अलआउट हुँदै ६३ रनमात्र बनायो । पछिल्लो १२ रन जोड्दा भैरहवाले ६ विकेट गुमाएपछि झीनो रन मात्र तयार गर्न सक्यो । चार विकेट गुमाउँदा ५१ रन जोडेको भैरहवाका लागि प्रारम्भिक ब्याट्सवुमेन प्रतीक्षा बस्यालले सर्वाधिक ३२ रन बनाइन् । उनले ४९ बलमा ३ चौका प्रहार गरेकी थिइन् । अरू कोही खेलाडीले दोहोरो अंक जोड्न सकेनन् । पुछारका तीन खेलाडीले खाता खोल्न सकेनन् । सत्रौं ओभरको अन्तिम दुई बलमा लगातार विकेट लिएकी संगीताले चार ओभरमा १२ रन खर्चंदै चार खेलाडीलाई पेभेलियन फर्काएकी थिइन् । जवाफमा विराटनगरले १३ ओभर ४ बलमा ८ विकेट गुमाउँदै ६४ रन बनायो । उसका लागि रोशना राई र संगीता राईले दोस्रो विकेटका लागि २५ रनको साझेदारी गरे । संगीताले १५ र रोशनाले ११ रन बनाउनुबाहेक अरू दोहोरो रन बनाउनबाट चुके । टिमले २१ अतिरिक्त रन पायो । भैरहवाका सोनिया पौडेलले तीन तथा इन्दु बर्मा र सैया गुरुङले दुई/दुई विकेट लिए । विराटनगरकी काजोल श्रेष्ठ तीन खेलमा एक अर्धशतकसहित १ सय २ रन बनाउँदै उत्कृष्ट ब्याट्सवुमेन बनिन् । भैरहवाकी सोनिया पौडेल उत्कृष्ट बलर चुनिइन् । उनले तीन खेलमा १५ ओभर बलिङ गर्दै ८ विकेट लिइन् । विराटनगरकी सञ्जना बुढाथोकी 'प्लेअर अफ द सिरिज' बनिन् । उनले पाँच खेलमा ६ विकेट लिनुका साथै ८१ रन जोडेकी थिइन् ।
0 comments
Write Down Your Responses