slider, समाचार » नेपाल र युएईले एसीसी ट्रफीको उपाधि बाँड्यो पारस प्रतियोगिताकै उत्कृष्ट खेलाडी

२६ असोज, काठमाडौं । एसीसी ट्रफी एलिट कप क्रिकेटको उपाधि नेपाल र युएईले बाँडेका छन् । शुक्रबार भएको फाइनल भिडन्तमा दुबै टोलीले समान २ सय ४१ रन बनाएपछि उपाधि बाँडेका हुन् । सन् १९९६ देखि एसीसी ट्रफी खेल्दै आएको नेपालले उपाधि उचालेको यो पहिलो पटक हो । युएईले प्रस्तुत गरेको २ सय ४२ रनको लक्ष्य पछ्याएको नेपालले निर्धारित ५० ओभरमा ९ विकेटको क्षतिमा २ सय ४१ रन बनायो । जितका लागि अन्तिम ओभरमा १२ रन चाहिएकोमा नेपालले ११ रन मात्र बनायो । पहिलो बलमा नेपालले रन लिन सकेन भने दोस्रो र तेस्रो बलमा एक-एक रन बनाएको नेपालका लागि तेस्रो बलमा शक्ति गौचनले छक्का हानेर जितको आश जगाए । अन्तिम ओभरका ५ औं बलमा शक्तिले २ रन लिएपछि जितका लागि नेपाललाई अन्तिम बलमा २ रन चाहियो । अन्तिम बलमा उनले एक रन मात्र बनाउन सके । दोस्रो रनका लागि दौडिएका उनले डाइभ हान्दै रन जोड्ने प्रयास गरेपनि सकेनन् र खेल बराबरीमा सकियो । नेपालको सुरुवात भने निकै राम्रो थियो । पहिलो विकेटका लागि ९४ रनको साझेदारी गरेका सुवाष खकुरेल ५५ र अनिल मण्डल ४४ रनमा आउट भए । उपकप्तान ज्ञानेन्द्र मल्लले ३२ र कप्तान पारस खड्काले ३१ रन बनाए । मल्ल र खड्काले ५९ रनको महत्वपूर्ण साझेदारी गरे । सदर भेसवाकरले ३६ बलमा ३८ रन बनाए । यसअघि शारजहाँ मैदानमा टस हारेर पहिले ब्याटिङ गरेको युएईले अकिव अलीको शतकको मदतमा निर्धारित ५० ओभरमा ६ विकेटको क्षतिमा २ सय ४१ रन बनायो । १ सय ३ बलको सामना गरेका उनी २ छक्का र ८ चौकाको मदतमा १ सय १ रनमा अविजित रहे भने कुर्राम खानले ६१ रन जोडे । स्कोर बोर्डमा रनको खाता खोल्न नपाउँदै पहिलो विकेट गुमाएको कुनै समय युएईले कुनै समय २४ रन जोड्दा महत्वपूर्ण ३ विकेट गुमाएको थियो । नेपालको बलिङ र फिल्डिङ चल्न नसक्दा मध्यक्रमका व्याट्सम्यानहरुले युएईको पारी उकासेका थिए । नेपालका शक्ति गौचनले १० ओभरमा २ मेडन राख्दै ३६ रन दिएर ३ विकेट लिए भने बसन्त रेग्मीले १ विकेट लिए । नेपालका कप्तान पारस प्रतियोगिताकै उत्कृष्ट खेलाडी बने ।

0 comments

Write Down Your Responses