मिस नेपाललाई 'कहिल्यै प्रेम प्रस्ताव आएन'

काठमाडौं, चैत ९ (नागरिक)- अन्तिम १८ युवतीमध्ये उत्कृष्ट भई बुधबार मिस नेपालको उपाधि जितेकी इशानी श्रेष्ठ बिहीबार प्रतियोगिताको आयोजक हिडेन ट्रेजरको कार्यालयमा भेटिइन्। उनीसँग गरिएको कुराकानीः
सुन्दरी हुनुहुन्छ, प्रेम प्रस्ताव कति पाए?
अच्चमको कुरा २१ वर्षको भइसक्दा पनि प्रेम प्रस्ताव आएन। मिस नेपाल भएँ, अब आउला कि!
'ड्रिम ब्बाई'को बारेमा कस्तो धारणा छ?
लभ गर्ने खालको केटा भेटेको छैन। मलाई बुझ्न सक्ने, राम्रो लुक्स भएको, पढेलेखेको र प्रोत्साहन गर्ने केटाको कल्पना गरेकी छु।
फिल्म खेल्न खाजेको कुरा पनि आयो, हिरोइन बन्न चाहनुहुन्छ?
यो वर्ष होइन, मनपर्दो स्त्रि्कप्ट पाए अर्को वर्ष खेल्छु। अहिलेसम्म फिल्मको अडिसन दिन गएकी छैन। चित्रकलामा विशेष रुचि छ। चित्रकार रागिनी उपाध्यायबाट प्रभावित छु र फुर्सदमा चित्र कोर्ने गर्छु। गणेशको चित्र बनाउन सजिलो लाग्छ।
हरेक पटक मिस नेपालको घोषणा हुँदा उब्जिने विवादबारे प्रतिक्रिया के छ?
मैले पनि सुन्ने गरेको थिएँ फिक्सिङ हुन्छ भनेर। मेरो बारेमा पनि नेवार भएकाले जितेको भने। तर मलाई लाग्यो, मिस नेपाल हुने गुण भएकाले नै जितेकी हुँ। केहीले साथ दिएको हो भने त्यो भाग्यले मात्र हो।
पढाइलाई निरन्तरता दिन सक्नुहुन्छ?
पिपुल्स डेन्टलमा अध्ययरत छु। एक वर्ष मिस नेपालको दायित्व पूरा गर्नतर्फ लाग्छु।
मिस नेपाल भएको रात निदाउनुभयो?
घर पुगेपछि एकछिन ताजलाई हेरेर बसेँ। ताजसँगै जिम्मेवारी थपिएको अनुभव भयो। सामान्यबाट जिम्मेवार युवती भएको अनुभूति गरिरहेँ।
बाल्यकालको रमाइलो घटना के छ?
सानोमा ब्वाइज कट कपाल, लुज टिसर्ट र पाइन्ट धेरै लगाएँ। मेरो संगत केटाहरुसँग बढी हुन्थ्यो। ग्याङ बनाएर हिँड्थ्यौं। रमाइलो थियो बाल्यकाल।
कस्ता योजना बनाउनु भएको छ?
ग्रामिण क्षेत्रमा नपुग्नाले राम्ररी नेपाल बुझ्न सकेको छैन। वास्तविक नेपालको चित्र हेर्नेछु र आफ्नो क्षमताअनुसार सामाजिक कार्यमा सहभागी हुन्छु।
देशको राजनीति कति बुझ्नु भएको छ?
राजनीतिले समाजलाई प्रभावित गर्ने हुँदा यसबारे जानकारी राख्नुपर्छ। देशको घटनाक्रम थाहा नपाए राम्ररी अघि बढ्न सक्दैनौं। समाचारको लागि मलाई पत्रपत्रिका नै चाहिन्छ। अनलाइनमा पनि विविध विषयबारे अपडेट हुन्छु।
मिस वर्ल्डको तयारी के छ नि?
आगामी असोज १२ मा इन्डोनेसियामा हुने मिस वर्ल्डमा नेपालको प्रतिनिधित्व गर्न पाउनु ठूलो कुरा हो। एक हप्तापछि मिस वर्ल्डको तयारी सुरु हुन्छ। मैले सिकेको कुरालाई अवश्य लागु गर्नेछु।