तपाइँको फेसबुक वालमा कसैले आपत्तिजनक कुरा पोष्ट गरेको छ ? कसैले फेसबुकमार्फत अश्लील तथा आपत्तिजनक सन्देश पठाएको छ ? वा तपाइँको पोष्टमा आपत्तिजनक कमेण्ट गरेको छ ? यदि छैन भने तपाइँ भाग्यमानी हुनुहुन्छ र यस्तो तितो अनुभुति गर्नुभएको छ भने पनि चित्त नदुखाउनुहोला किनकी यसरी फेसबुकमार्फत आपत्तिजनक सामाग्री प्राप्त गर्नेमा तपाइँ एकजनामा मात्र हुनुहुन्न । एक अध्ययनले सयमा दश जना फेसबुक प्रयोगकर्ताले फेसबुकमार्फत यस्ता आपत्तिजनक सामाग्री तथा सन्देश पाउने गरेको देखाएको छ ।

अध्ययन अनुसार दश प्रतिशत फेसबुक प्रयोगकर्ता आफ्नो फेसबुक वालमा कसैले आपत्तिजनक तथा अमर्यादित खालका सामाग्री पोष्ट गरेको वा गिज्याउने, दुव्र्यवहार र धम्कीपूर्ण सन्देश पठाउने गरेको घटनाका भुक्तभोगी छन् ।

टेलिग्राफ पत्रिकामा छापिएको अध्ययनका अनुसार सामाजिक संंजालको बढ्दो प्रयोगसँगै गैर सामाजिक सन्देशको प्रसार पनि बढेको छ ।

फेसबुकमार्फत यसरी आपत्तिजनक सन्देश वा सामाग्री प्राप्त गरेकामध्ये ६१ प्रतिशतले आफुले केवल १ वा २ चोटीमात्र यस्तो भोगेको बताए । जबकी ८ प्रतिशतले भने हरेक महिना जसो नै यस्ता अश्लील, धम्कीपूर्ण तथा आपत्तिजनक सन्देश पाउने गरेको बताए भने सयमा ३ जनाले एक महिनामा ३-४ पटक त्यस्तो भोगको बताए । अध्ययन अनुसार ३ प्रतिशत फेसबुक प्रयोगकर्ताले महिनामा ५ पटक त्यस्तो पीडा खप्नुपरेको छ ।

फेसबुकमा त्यस्ता आपत्तिजनक सामाग्री पठाउनेहरु मध्ये ६२ प्रतिशत चिनजानकै हुन्छन् भने २७ प्रतिशत चिन्दै नचिनेका र फेसबुकमा साथी पनि नभएका मान्छे हुन्छन् ।

अध्ययन अनुसार फेसबुकको तुलनामा टि्वटर प्रयोगकर्ता भने यस्तो पीडाबाट धेरै हदसम्म मुक्त छन् । केवल ५ प्रतिशत टि्वटर प्रयोगकर्ताले मात्र त्यस्तो धम्की तथा दुव्र्यवहारको सामना गर्नुपरेको छ । ३ प्रतिशत टि्वटर प्रयोगकर्तालाई आफ्नो टि्वट डिलिट गर्न धम्की आउने गरेको अध्ययनले देखाएको छ ।