ब्लाकबेरी फोनको निर्माता कम्पनी रिसर्च इन मोसनका मुख्य कार्यकारी थोर्सटेन हेइन्सले एप्पलको आइफोन आउटडेटेड भैसकेको टिप्पणी गरेका छन् ।

ब्लाकबेरीको बहुप्रतिक्षित नयाँ टचस्त्रिmन मोबाइल जेड १० सार्वजनिक गर्न आयोजित समारोहमा बिहिबार उनले यस्तो कडा टिप्पणी गरेका हुन् ।

एप्पल पूरानै ढर्रामा चलिरहेको भन्दै उनले नयाँ आविष्कारको कमीका कारण एप्पलले ग्राहकको विश्वास गुमाइरहेको र एप्पल प्रयोगकर्ताले नयाँ अनुभुति गर्न नपाएको दाबी गरे । आइफोनमा भन्दा ब्लाकबेरीको नयाँ संस्करणको मोबाइलमा धेरै सुविधा भएको दाबी समेत उनले गरे । अहिले मोबाइल प्रयोगकर्ताले मल्टिटास्किङ वा एकैपटक मोबाइलमा धेरै काम गर्न चाहने तर त्यो आइफोनमा सम्भव नहुने उनको तर्क छ । ब्लाकबेरीको नयाँ संस्करणमा भने प्रयोगकर्ताले एकैपटक डेस्कटपमा एकभन्दा धेरै एप्लिकेसन खोल्न सक्छन् । पाँच वर्षअघि आइफोन क्रान्तिकारी प्रडक्ट रहेको भएपनि अहिले त्यो यथास्थितीवादी बनिसकेको उनको टिप्पणी छ ।

ब्लाकबेरीका सिइओको यो टिप्पणीप्रति एप्पलका प्रवक्ताले भने प्रतिटिप्पणी गर्न अस्विकार गरेको एपीले जनाएको छ ।

यसैबीच ब्लाकबेरीको नयाँ भर्सनको किबोर्ड मोबाइल क्यू टेन कम्तिमा पनि २-३ महिनापछि मात्र बजारमा आउने भएको छ । यसअघि १० हप्ताभित्रै ब्लाकबेरीको नयाँ किबोर्ड भर्सन आउने भनिएको भएपनि त्यो अझै केही हप्ता पछाडि धकेलिने बताइएको छ । प्रयोगकर्ताले रुचाउने खालको अत्याधुनिक सफ्टवेयर तयार पार्ने काम भैरहेको र यहीँ तयारीका कारण ब्लाकबेरीको नयाँ किबोर्ड भर्सन आउन केही ढिलाई हुने ब्लाकबेरीका सिइओको भनाइ छ ।