१५ फागुन, काठमाडौं । एकीकृत नेकपा माओवादी अध्यक्ष पुष्पकमल दाहाल प्रचण्डले जेठभित्रै निर्वाचन सम्भव भएको बताउनुभएको छ । प्रधानन्यायाधीशको नेतृत्वमा चुनावी सरकार बनाएर निर्वाचन गर्न प्रमुख दलहरु र सरकार सहमत भैसकेकाले कानुनी जटिलता हटाएर जेठमै निर्वाचन गर्न सकिने उहाँको भनाई थियो ।

निजी भ्रमणका क्रममा मंगलबार पोखरा आएको प्रचण्डले बुधबार पत्रकारहरुसँग कुरा गर्दै जेठभित्रै निर्वाचन गराएर राष्ट्रलाई निकास दिन प्रधानन्यायाधीशको नेतृत्वलाई सबैले स्वीकारेको बताउनुभयो । बाधा अड्चन फुकाउन कुनै समस्या नरहेको भन्दै उहाँले बिहिबारसम्ममा टुङ्गो लाग्ने बताउनुभयो ।

प्रधानन्यायाधीशले सरकारको नेतृत्व लिएपछि शपथ ग्रहणका लागि अदालतको फैसला कुर्नु पर्ने भन्दै उहाँले यस्तो अन्तरबिरोधको समाधानका लागि दलहरुको छलफल केन्दि्रत रहेको उल्लेख गर्नुभयो । सर्वोच्चको फैसला नआउँदासम्म यही सरकार चल्ने तर, चार दलको सहमतिमा मात्र निर्णय गर्ने उहाँको भनाई थियो ।

एक अर्को प्रसङ्गमा प्रचण्डले कानुन र संविधान भन्दा राष्ट्र र राष्ट्रलाई परेको अप्ठेरोको निकास ठूलो भएको बताउनुभयो ।

नेपाल बार एशोसियसनको बिरोधप्रति लक्षित गर्दै प्रचण्डले २०४८ साल, २०६२/६३ को जनआदोलनपछि भएको संसद पुनःस्थापना पनि कानुनसम्मत नभएको जिकीर गर्नुभयो । उहाँले असाधारण जटिल परिस्थितिमा निकास दिनु नै अहिलेको मुख्य एजेण्डा भएको भन्दै उहाँले मुलुकलाई अनिर्णयको बन्दी बनाएर राष्ट्रलाई र भड्खालोमा हाल्न नहुने बताउनुभयो ।