१४ फागुन, काठमाडौं । हृदयघात भएर अस्पताल भर्ना भएका पूर्वयुवराज पारस शाहको स्वास्थ्य लाभको कामना गर्दै देशभर पूजापाठ भएका छन् । विश्व हिन्दू महासंघ, शिव सेना नेपाल, राष्ट्रवादी युवा संघ लगायतका राजावादी संघसंस्थाको आयोजनामा मन्दिरमा पूजापाठ भएको हो ।

सोमबार ललितपुरको पाटन दरबार नजिकै रहेको हिरण्यवर्ण महाविहारमा प्रज्ञा पारमिता पाठ भएको छ । ‘उहाँको भाकलअनुसार नै यहाँ कार्यक्रम भएको हो’ आयोजकमध्येका एक डा. मिलनकुमार थापाले अनलाइनखबरसित भन्नुभयो । यस्तै बागलुङको कालिका मन्दिरमा पनि स्वास्थ्यलाभको कामना गर्दै पूजापाठ गरिएको छ । मकवानपुरमा पनि पूजापाठ भएको पूर्वराजपरिवारकी सहयोगी कमला शर्माले अनलाइनखबरलाई जानकारी दिनुभयो ।

राजावादीहरुको आयोजनामा कार्यक्रम भए पनि पूजापाठमा सर्वसाधारणको समेत उपस्थिति देखिन्थ्यो । एक हप्तादेखि अस्पताल भर्ना भएका पारसप्रति पछिल्लोसमयमा सहानुभूति बढ्दै गएको छ ।