फेसबुकका संस्थापक मार्क जुकरबर्ग र उनकी पत्नी पि्रस्सिला चान अमेरिकामा सबैभन्दा धेरै रकम दान गर्ने दम्पतीहरुमध्ये दोश्रो स्थानमा परेका छन् । अघिल्लो वर्ष मात्र जुकरबर्ग दम्पतीले विभिन्न संस्था तथा व्यक्तिहरुलाई गरी झण्डै आधा अर्ब डलर दान दिएका छन् ।

सबैभन्दा बढि दान गर्नेमा अर्बपति वारेन बफेट छन् । अघिल्लो वर्ष जुकरबर्ग दम्पतीले ४९ करोड ८८ लाख अमेरिकी डलर दान गरेकोमा वारेन बफेटले ३ अर्ब १० करोड डलर दान गरे ।

सिएनएनले सार्वजनिक गरेको अमेरिकाका दानी धनाढ्यहरुको सूचिमा सबैभन्दा दानी पाँच जनाको सूचिमा जुकरबर्ग दम्पतीसँगै सूचना प्रविधि उद्योगका अरु तिन जना पनि परेका छन् ।

दानी अमेरिकीहरुको तेश्रो स्थानमा समाजसेवी जोन आर्नोल्ड र उनकी पत्नी लाउरा परेका छन् । चौथो स्थानमा माइक्रोसफ्टका सहसस्थापक पाउल एलेन छन् । उनले गएको वर्ष झण्डै ४० करोड डलर दान गरे ।

यस्तै गुगलका सह संस्थापक सर्जेइ बि्रन र उनकी पत्नी एन्ने उज्कीकी २२ करोड ३० लाख डलर दान गर्दै पाँचौ स्थानका दानी बनेका छन् । फेसबुकमा झण्डै १२ अर्ब डलरको सम्पत्ति रहेका जुकरबर्ग सन् २०१० देखि दानपुण्यको काममा लागेका थिए । उनले न्यू जर्सीको एक विद्यालयलाई त्यसबेला १० करोड डलर सहयोग प्रदान गर्ने घोषणा गरेका थिए ।