गोरखापत्र बाजे मृत फेला

कास्की, माघ २१ - गोरखापत्र बाजेको रुपमा परिचित चन्द्रकान्त पौडेल आइतबार दिउँसो मृत अवस्थामा फेला  परेका छन् । मृत अवस्थामा  उनको शव माटेपानी स्थित सेती नहरमा फेला परेको प्रहरीले जानकारी दिएको हो । शवको प्रकृति हेर्दा आत्महत्या गरेको हुन सक्ने प्रहरीले अनुमान गरेको छ ।
झिस्मिसैमा उठेर महेन्द्रपुल स्थित पत्रिका पसलमा पुग्ने बाजे बिहानै देखि वेपत्ता भएका थिए । कही कतै फेला नपरेपछि उनको शव नहरमा भेटिएको हो ।  ८१ वर्षीय  पौडेल बिगत ५२ वर्ष देखि  अहिले सम्म पनि पत्रिका वितरणको काम गर्दै हिंडथे ।  उनलाई उनको वास्तविक नामबाट भन्दा पनि 'गोरखापत्र बाजे' को नामले सबैले चिन्ने गर्थे ।
पत्रिकाहरुमा प्रकाशित हुने  घतलाग्दा शीर्षक भट्याउदै बजार- बजार डुल्दै हिंड्दा सबैले कान ठाडो पारेर  पत्रिका किन्न बाध्य हुन्थे ।  पञ्चायती व्यवस्थाका विरुद्ध पत्रिकामा लेखिएका  समाचार भट्याउने देखि  लोकतन्त्र ल्याउन पत्रिकामा लेखिएका समाचार  भट्याउने क्रममा उनले घटनाक्रमहरुको समाचार मिडियाहरुमा दिएर संवाददाताको काम समेत गरे ।
'लामो समय देखि पत्रिका वितरणमा लागेका उनले राजनितिक चेतना जोगाउने पाठक वृद्धिमा योगदान दिए' अग्रज पत्रकार नारायण कार्कीले भने, 'पत्रिका  पढनुपर्छ भन्ने भावना  जागृत गराउने काममा पनि योगदान रहेको छ ।
पोखरामा प्रकाशित हुने पहिलो पत्रिका  हिमदुतबाट बाजेले वितरणको काम सुरु गरेका हुन् । त्यतिबेला उनले पत्रिका बोकेर हिड्दा कसैले पत्रिका हेर्न त के पढ्न समेत चाहदैनथे । पत्रिका पढने बानी बसाल्न सित्तैमा पत्रिका समेत दिन्थे ।    पोखरामा पत्रकारिताको सुरुवात र पत्रिका पढनुपर्छ भन्ने परिपाठी भने यीनैले बसालेका हुन । पत्रिका वितरण मात्र हैन त्यतिबेला उनले संवाददाताकै भूमिकामा काम पनि गर्थै ।
 सरकारी स्तरको गोर्खापत्र बाहेक अरु पत्रिका प्रकाशन हुँदैनथे । त्यतिबेला उनले गोरखापत्र बिक्री गर्न सुरु गरेका थिए गोरखापत्र  बिक्री गर्दै आएकाले उनको नाम नै गोर्खापत्र बाजे बनेको हो ।  कान्तिपुर लगायतका पत्रपत्रिका प्रकाशन हुन थालेपछि ती पत्रिका विक्री गरेर बजार प्रर्वद्धन  गरे । युवाहरुलाई उनीहरुको चाहना अनुसारका साप्ताहिक लगायतका मनोरञ्जनात्मक  मासिक र अरुलाई राजनितिक खालका पत्रपत्रिकाका शीर्षक भटाउदै बिक्री गर्ने गरेका छन् ।  सुरुमा  डेढ दुई सय पत्रिका बोकेर हिडेका उनी अहिले पनि  ६० देखि ७० वटा पत्रिका काँधमा बोकेर हिंडदै आएका थिए  ।