'बधशाला चलाउन दिइनुपर्छ'

रक्षा मन्त्रालयले प्रतिबन्ध लगाएको फिल्म 'बधशाला'लाई रिलिज गराउन फिल्मकर्मीहरुले दबाब दिने निर्णय गरेका छन्। काठमाडौंमा बिहीबार फिल्म निर्देशक र निर्माताहरुको एक छलफल भेलाले यस्तो निष्कर्ष निकालेको हो। फिल्मलाई चलचित्र विकास बोर्डले सेन्सर प्रक्रियामा जान सिफारिस नदिए विरोध जनाउने फिल्मकर्मीहरुको योजना छ।
रक्षा मन्त्रालयले सूचना तथा सञ्चार मन्त्रालयलाई गत माघ ३ मा पत्र पठाउँदै 'बधशाला' प्रदर्शनको लागि इजाजत प्रदान नगर्न र प्रदान गरिसकेको भए फिल्म हल लगायतमा प्रदर्शन हुनबाट रोक लगाइदिन आग्रह गरेको छ। रक्षाको पत्रमा 'नेपाली सेनाको पोशाकलगायतका विषयमा स्वीकृति नलिएकोले प्रदर्शनमा रोक लगाउने नेपाल सरकारको सचिवस्तरीय निर्णय भएको' उल्लेख छ।
छलफलमा सहभागी फिल्मकर्मीको सल्लाह अनुसार 'बधशाला'का निर्देशक मनोज पण्डित र निर्माता मोहन डोटेलले केही दिनपछि सेन्सरको स्वाभाविक प्रक्रियामा जाने निर्णय लिएका छन्।
'लुट'का निर्देशक निश्चल बस्नेतले छलफल कार्यक्रममा फिल्मकर्मीको सोचमा बन्देज लगाउन खोज्ने प्रवृत्तिको विरोध गरिनुपर्ने बताए। 'फिल्मकर्मीलाई एउटा घेरामा बाँधेर, तैंले यो गर्न पाउँछस्, त्यो गर्न पाउँदैनस् भनेर निर्धारण गर्ने प्रवृत्तिको यो उदाहरणविरुद्ध फिल्मकर्मीले अभियान चलाउन जरुरी छ,' बस्नेतले भने।
फिल्मकर्मीलाई नौटंकी गर्नेको जमात ठानिएको छायाँकार शैलेन्द्र डि कार्कीले आरोप लगाए। 'फिल्मसँग असम्बन्धित मन्त्रालयले गरेको यो हस्तक्षेप, फिल्मकर्मीलाई एउटा कमिला जति पनि नठान्ने मानसिकताको उपज हो,' कार्कीले भने, 'फिल्मकर्मीले कुनै कुरा पोख्ने फिल्मबाटै हो, त्यही माध्यममा अंकुश लगाउनु भनेको मुख थुनेसरह हो।'
नेपालजस्तो 'सिस्टम' नै नभएको मुलुकमा फिल्मकर्मीको स्वतन्त्रतामाथि भविष्यमा पनि आक्रमण हुनसक्ने र त्यस्तो अवस्थामा फिल्मकर्मीहरु एकजुट भएर लड्नुपर्ने निर्देशक छिरिङरितार शेर्पाले बताए। अर्का निर्देशक प्रचण्डमान श्रेष्ठले 'बधशाला'मात्र होइन भविष्यमा अरु फिल्मविरुद्ध यस्तै कदम दोहोरिन नदिन फिल्मकर्मीहरुले दीर्घकालीन रणनीति बनाउनुपर्ने आवश्यकता औंल्याए। 'लोकतान्त्रिक देश हो भने नेपाली सेनामाथि कुनैपनि फिल्मकर्मीले प्रश्न उठाउन पाउनुपर्छ, सेना पनि जनताको करबाट चल्ने संस्था हो,' निर्देशक श्रेष्ठले भने।
फिल्म सेन्सर र इजाजतसम्बन्धी चलचित्र नियमावलीमै परिवर्तन ल्याउन फिल्मकर्मीले दबाब दिनुपर्ने निर्माता पदम सुब्बाले सुझाव दिए। छलफल कार्यक्रममा आशिफ शाह, अनुप बराल, चन्दु झा, माधव वाग्ले, सौगात मल्ल, अर्पण थापा, दयाहाङ राई, राजन खतिवडा, सरिता गिरी, समुना केसी, फिडेल देवकोटा, अविनाशविक्रम शाह लगायत कलाकार तथा फिल्मकर्मीको सहभागिता थियो।
निर्माण पक्षले 'बधशाला'लाई आगामी फागुन २५ मा रिलिज गर्ने उद्देश्यले प्रचारप्रसार सुरु गरिसकेको छ।