२१ माघ, काठमाडौं । एकीकृत नेकपा माओवादीका अध्यक्ष पुष्पकमल दाहाल प्रचण्डले भारतसँगको सीमा विवादबारे जनमत संग्रह गर्ने प्रस्ताव गर्नु भएको छ । सीमाविद् तथा इतिहासविद्हरुले भने प्रचण्डको प्रस्ताव आपत्तिजनक भएको बताएका छन् ।

हेटौंडामा जारी महाधिवेशनको बन्द सत्रमा पेश गर्न लागिएको प्रचण्डको प्रस्तावको पृष्ठ ५० मा सीमासम्वन्धी सवाल देश र जनतालाई दीर्घकालीन असर पर्ने सबाल भएकाले जामत संग्रह गर्ने उल्लेख छ । प्रतिवेदनमा भनिएको छ–’सीमा सम्बन्धी सवाल देश र जनतालाई व्यापक र दीर्घकालीन असर पार्ने सवाल भएकाले यस मामिलामा नेपाली जनताको सार्वभौमसत्तालाई ध्यान दिंदै जनमत संग्रह मार्फत् यसलाई अन्तिम स्वरुप दिइने छ ।’ यद्यपी जनमत संग्रह कसरी हुन्छ भन्ने केही उल्लेख छैन । 

यसअघि माओवादीले भारतले नेपालको सीमा मिचेको भन्दै आएको थियो । तत्कालिन प्रधानमन्त्री माधवकुमार नेपालको सरकारविरुद्ध आन्दोलन गर्ने क्रममा सीमा क्षेत्रमा पुगेर चर्को विरोध समेत गरेका थिए । 

सीमाविद बुद्धिनारायण श्रेष्ठका अनुसार भारतले ७१ स्थानमा सीमा मिचेको छ । ६० हजार ६ सय ६२ हेक्टर जमिन भारतले अतिक्रमण गरेको उहाँको भनाई छ । 

प्रचण्डको प्रतिवेदनमा नेपालको अन्तर्राष्ट्रिय सीमानाको सुरक्षा, व्यवस्थापन र सिमांकनको मुख्य जिम्मेवारी संघीय सरकारको हुने उल्लेख छ । नेपालको भूमिमाथि हुने कुनै पनि गतिविधिहरुमाथि निगरानी राख्न र सुरक्षा प्रदान गर्नका लागि नेपाल आंफै सवल र सक्षम रहेको भन्दै प्रतिवेदनमा कुनै पनि अन्य देशका सुरक्षाबलका कुनै पनि निकायहरुलाई कुनै पनि बहानामा नेपाल भित्र नराखिने उल्लेख छ ।