सुकुम्बासीबारेको 'सेल्टर' देखाइयो

काठमाडौ, माघ २१ - केही समयअघि सरकारले अमानवीय तबरले बस्तीमा डोजर चलाएपछि बिचल्लीमा परेका सुकुम्बासीको बासको सरकारले अझै पनि उपयुक्त विकल्प दिन सकेको छैन । दीपक तोलांगे निर्देशित डकुमेन्ट्री 'सेल्टर' ले तिनै सुकुम्बासीको पीडा, दुखेसोलाई एक परिवारमार्फत् देखाउन खोजेको छ । ४० मिनेट लामो डकुमेन्ट्रीलाई शुक्रबार अनामनगरस्थित मन्डला थिएटरमा देखाइयो ।
 मीना बस्नेत र उनकी छोरी निर्जलालाई पछ्याएको डकुमेन्ट्रीले सरकारको दायित्व, राजनीतिक पार्टी र संघसंस्थाहरूको सुकुम्बासीप्रतिको दृष्टिकोण  पनि समेटेको छ । डकुमेन्ट्रीलाई सुकुम्बासी विद्यार्थीहरूको शिक्षामा सहयोग गर्ने उद्देश्यले प्रदर्शन गर्दै लगिने निर्देशक तोलांगेले बताए ।
रुविन मानन्धर र अनिश रेग्मीले डकुमेन्ट्री 'सेल्टर' खिचेका हुन् भने सम्पादन शिव पुरीको । डकुमेन्ट्रीमा अनिल शाहीको म्युजिक प्रयोग गरिएको थियो । १७ महिना लगाएर खिचिएको डकुमेन्ट्री तयार हुन दुई वर्ष लागेको निर्माता प्रकाश तिमिल्सिनाले बताए ।