गैंडाको न्वारनमा भोज...

१३ माघ, बर्दिया । मानिसले जन्माएका बच्चाको न्वारन हुन्छ सबैलाई थाहा छ, जंगली जनावर गैडाको न्वारन भएको सुन्दा आश्चर्य लाग्ला । हो, बर्दिया राष्ट्रिय निकुञ्जसँग जोडिएको शिव सामुदायिक वन डल्लामा गैडाले जन्माएको बच्चाको नबौं दिन शुक्रबार तामझामका साथ न्वारन गरिएको छ ।

गैडाको न्वारन पण्डित नभई स्थानीय संरक्षणवादीले विधिवत रुपमा गरेका हुन् । वन्यजन्तुको संरक्षणमा लागेका अन्तराष्ट्रिय अब्राहम पुरस्कार विजेता जिल्लाको ढोढरी ९ खाताका भदै थारु, संरक्षणकर्मी कृष्ण परियारले गैडाको नाम संयुक्त रुपमा घोषणा गरेका थिए ।

गैडा बच्चाको उपस्थिविना न्वारनमा सयभन्दा बढी उपभोक्ताको सहभागीता रहेको थियो । सुरक्षाका कारण जंगलमा रहेको बच्चालाई भने बाहिर नल्याई उसको फोटोबाटै नामाकरण गरियो, जसबाट उसको नाम शिबु राखिएको खबर कान्तिपुर दैनिकले छापेको छ ।