२५ पुस, काठमाण्डौ । खाडी मुलुक बहराइनको राष्ट्रिय ध्वजाबहाक गल्फ एयरले काठमाण्डौ उडान बन्द गर्ने भएको छ ।

नेपाल उडानमा घाटा भएपछि एयरलाइन्सले आगामी मार्च २५ देखि सम्पूर्ण उडान बन्द गर्न लागेको हो । हाल सातामा १४ उडान गरिरहेको गल्फ एयरले यही शुक्रबारदेखि सातामा पाँचवटा मात्र उडान गर्दै छ ।

गल्फ एयरको उडान बन्द भएपछि बहराइन-काठमाण्डौ आवतजावत गर्ने नेपाली मजदुरहरुलाई असर गर्ने भएको छ ।

एयरलाइन्सले आफ्नो वेबसाइटमा एक सूचना राख्दै नेपालका लागि अन्तिम उडान मार्च २४ मा हुने बताएको छ । गल्फ एयरले नेपालसहित बंगलादेश र श्रीलंकाको उडान पनि बन्द गर्दै छ । एक महिना पहिले मात्र उसले डेनमार्कको कोपनहेगन र इटलीको रोममा आफ्ना उडान बन्द गर्ने घोषणा गरेको थियो ।

गल्फ एयरको नेपालस्थित जनरल सेल्स एजेण्ट प्रेसिडेण्ट ट्राभलले भने त्रिभुवन बिमानस्थलको ग्राउण्ड ह्याण्डलिङ र पार्किङ चार्ज महंगो भएकाले उडान बन्द गर्नुपरेको जनाएको छ ।