"बौद्ध अब रेलिगेसनमा"

काठमाडौ, पुस २१ - बौद्ध र आइसबर्ग मध्यपुरले लिगका निम्ति ठूलो बजेट बनाएका थिएनन् । दुवैको लक्ष्य पनि समान थियो, सके शीर्ष आठमा पर्ने नसके 'ए' डिभिजनमै रहने । मध्यपुरले डिफेन्डिङ च्याम्पियन पुलिसलाई बराबरीमा रोक्दै लिगमा आकर्षक सुरुआत गरेको थियो । ठीक उल्टो बौद्ध सुरुबाटै कमजोर देखियो । उसको खेल साह्रै खराब थिएन, तर आसलाग्दो पनि थिएन ।
उच्च श्रेणीमै टिक्ने झीनो आस बोकेका यी दुईको प्रतिस्पर्धामा मध्यपुरले शुक्रबार बाजी मार्‍यो । जितपछि कम्तीमा एक दिनका निम्ति भए पनि रेलिगेसन क्षेत्र छाडेको मध्यपुरका प्रशिक्षक उपेन्द्रमान सिंहले उही उखान दोहोर्‍याए, 'सास भएसम्म आस हुन्छ ।' उनको मुहारमा केही उज्यालो पनि छाएको थियो । ठीकविपरीत देखिए, बौद्धका प्रशिक्षक किरण श्रेष्ठ ।
'अब रेलिगेसनमा पर्‍यौं । बच्ने उपाय छैन,' श्रेष्ठले भने । उनले क्लब व्यवस्थापकको कमजोरीले लिगमा असफल भएको बताए । 'एनसेल कपमा राम्रो खेलेकाले टिमप्रति व्यवस्थापक महत्त्वाकांक्षी देखिए । तयारी गर्ने समय र ४-५ विदेशी खेलाडी राख्ने माग पूरा भएन । त्यसैले व्यवस्थापकले हेलचेक्रयाइँ गर्‍यो,' उनले भने । केही राम्रो खेलाडी घाइते भएको र उनीहरूको स्थान लिनसक्ने नभएकाले पनि गाह्रो भएको उनले बताए ।
व्यवस्थापकीय कमजोरीका बाबजुत पनि अनुशासित भएर खेलिरहेकाले नतिजाप्रति खासै दुःख नलागेको श्रेष्ठले बताए । ११ खेलबाट १ अंक जोडेको बौद्ध पुछारमा छ । एनएमबी मछिन्द्रविरुद्ध बुधबार हार्‍यो भने बौद्ध ३ खेलअगावै 'बी' डिभिजनमा झर्ने निश्चित हुनेछ । 'ए' डिभिजनमा उक्लेको पहिलो वर्ष २०६३ मै बौद्ध रेलिगेसनमा परेको थियो । त्यसपछि उच्च श्रेणीमा फर्केयता उसको दोस्रो सिजन हो यो ।
लगातार चार हारको दुःखद यात्रामा मल्हम लगाएपछि मध्यपुरले १० अंक बनाउँदै कम्तीमा एक दिनका निम्ति भए पनि रेलिगेसन क्षेत्र छाड्यो । बौद्धसँगै महिन्द्रा बाँसबारी (५) र एपीएफ (९) रेलिगेसन क्षेत्रमा छन् । एपीएफले एक खेल कम खेलेको छ ।
'महत्त्वपूर्ण ३ अंक हात पार्‍यौं । तैपनि 'ए' डिभिजनमै रहन निकै गाह्रो छ,' मध्यपुरका अध्यक्षसमेत रहेका प्रशिक्षक उपेन्द्रले भने, 'सरस्वती र संकटासँगको हार ठूलो घाटा भयो । तर खेलाडीलाई उत्साहित पार्न कन्जुस्याइँ गरेको छैन । अबको खेल जिते बोनस दिनेछौं ।' मध्यपुरले मंगलबार फ्रेन्ड्सविरुद्ध खेल्नेछ । त्यसपछि एनआरटी जावलाखेल र हिमालयन शेर्पाविरुद्ध भिड्नेछ ।
आत्मघाती गोल एबिडुनले क्रस गरेको बल क्लियर गर्ने प्रयासमा बौद्धका हेम तामाङले आत्मघाती गोल गरेपछि तेस्रो मिनेटमै मध्यपुरले अग्रता लिएको थियो । एबिडुनले पेनाल्टी क्षेत्रको ठीक बाहिरबाट प्रहार गरेको फ्रिकिक सुन्दर गोलमा परिणत भएपछि मध्यपुरले २५ औं मिनेटमा अग्रता दोब्बर बनायो । तेस्रो गोल अफसाइड ट्रयापमा विनोद विष्टले ९० औं मिनेटमा गरे ।
मनाङ दूरी छोट्याउँदै रेलिगेसनको संघारमा रहेको बाँसबारीलाई ४-२ ले पन्छाउँदै लक्ष्मी हुन्डाई मनाङ-मस्र्याङ्दीले थ्री-स्टारसँगको दूरी २ अंकमा छोट्यायो । थ्री-स्टार २६ अंकसहित शीर्षस्थानमा छ । एक खेल कम खेलेको मछिन्द्र २३ अंकसँगै तेस्रोमा छ ।
मनाङको जितमा सुजल श्रेष्ठले दुई तथा कप्तान अनिल गुरुङ र अमिर श्रेष्ठले एक-एक गोल गरे । सुजलले ३२ औं मिनेटमा गोलको खाता खोले । त्यसको ३ मिनेट नबित्दै अनिलले अग्रता दोब्बर पारे । सुजलले पहिलो हाफको इन्ज्युरी टाइममा दोस्रो गोल गरे । अमिरले एकल प्रयासमा ७१ औं मिनेटमा बललाई जाली चुमाए । बाँसबारीका निम्ति दुवै गोल नीरकुमार राईले गरे । उनले ६९ र ८७ औं मिनेटमा गोल गरे । उनलाई दुवै गोलमा श्यामबाबु मगरले बल उपलब्ध गराएका थिए । पहिलो रोजाइका ३ डिफेन्डर चोटमुक्त नभएकाले गोल बेहोर्नुपरेको मनाङका प्रशिक्षक कृष्ण थापाले बताए । बाँसबारीका प्रशिक्षक दीपेश योञ्जन लामाले भने, 'बाँकी ४ खेल आफ्नै स्तरका विरुद्ध खेल्दैछौं । त्यसमा राम्रो गर्दै रेलिगेसन टार्ने आस छ ।'